السمارة اليومية:السمارة
يعيش حزب الاستقلال هاد الايام على صفيح ساخن بسبب تطاحن القيادات على تسيير المرحلة المقبلة الي غادي تشهد الانتخابات البرلمانية والي هي بروفة للانتخابات الجماعية بالاقليم
مصادر السمارة اليومية أكدت بلي حزب الاستقلال بالسمارة الان فيه جوج تيارات الأول كينادي بوحدة قيادة الحزب او مايكونش القرار متشتت باش الكل يلتزم تحت راية وحدة
التيار الثاني والي طلقو عليه سمية الرافضون كيحاول يتمرد على هاد السياسة الجديدة وكيضغط باش ايحافظ على المكاسب الي حققها خلال الاستحقاقات الماضية او هادشي كيزيد من التطاحن بين قيادات الحزب المحلية
من جهة اخرى وحسب متابعين للشأن الحزبي بالسمارة فكيشوف بلي هناك ثلاثة تيارات التيار الاول ولي كيستمد قوتو من منسق الجهات الثلاث للحزب الحاج حمدي ولد الرشيد الي مسخر كاع الامكانيات ديالو وعاجبو توجه هاد التيار الي كينادي بوحدة قيادة الحزب اوهاد بان فبزاف ديال القرارات اتخذها الحاج حمدي لصالحهم فيما يخص التيار الثاني الرافضون فكيعتبرو فرصتو ضعيفة فبسط نفوذو داخل الحزب محليا حيت خسر بزاف ديال الأوراق واصبح محسور فالزاوية رغم ان بعض المطالب الي كينادي بيها تبقى منطقية حيت هاد التيار كيتاهم التيار الاول بالاستفراد باتخاذ القرار اوما كياخذ رأيو فصناعة القرارات المحلية المهمة اوهادا كيعتبروه حيف فحقهم اومايساعد على منسوب الثقة وسط الحزب
التيار الثالث وهم الصامتون أو المهمشون الي ماعندهم مايديرو فهاد الحالة غير يشوفو وينتاظرو الجهة الي غادي تنتاصر فهاد المرحلة ويكونو معاها بسبب عدم التنسيق بيناتهم والتشرذم الي كيعيشوه رغم بعض المحاولات للفت الانتباه
