السمارة اليومية:السمارة
كدور في الاوساط السياسية بالسمارة اخبار عن رغبة مولاي ابراهيم الشريف في الترشح للانتخابات البرلمانية المقبلة
هاد الأخبار كتقول بلي الأنصار والمتعاطفين مع إبراهيم الشريف زادو من الضغط عليه في الآونة الاخيرة باش ايوافق على الترشح ولي الى حدود اللحظة مزال ماستاقر على شي قرار حسب المصادر ديال جريدة السمارة اليومية
المصادر المطلعة ولي اكدات لنا صحة هاد للأخبار قالت بان هاد القرار ديال الترشح صعيب بزاف اومايقدر يتاخذ فيه قرار دابا حتى توفر بعض الشروط الي هي جوهرية بالنسبة ليه
السمارة اليومية بحثات فهاد الموضوع وسولات بعض المهتمين بالشأن المحلي ولي أكدو أن بزاف ديال المؤشرات ولات كتبان عن نية ابراهيم الشريف الاعلان عن ترشحو للانتخابات البرلمانية العام المقبل
الاهداف الي متوقعة من هاد الاعلان المرتقب من هاد الترشح هو توسيع القاعدة الناخبة من خلال الجمع مابين رئاسة جماعة السمارة والنيابة البرلمانية والدفاع عن برامج جماعة السمارة التنموية مركزيا من خلال الحصول على الاعتمادات المالية لتلك البرامج إضافة إلى جعل السمارة قلعة استقلالية بامتياز
هذا من جانب اما الجانب الاساسي ولي هو مهم بزاف انو غادي اخفف الضغط على حمدي ولد الرشيد اوما يبقاش مبرزط مع الانتخابات فالسمارة ويكون هناك محاور واحد فيما يتعلق بالأمور كافة على الصعيد المحلي
المهم هناك رأي سائد بالسمارة انو اغلبية المتعاطفين والانصار مع تجربة المهندس والانصار كيشوفو بلي كاع الظروف مهيئة لييه باش يتصدر المشهد
ولكن فالمقابل راه هناك اصوات من داخل الحزب بالسمارة كتعتابر خطوة ابراهيم الشريف المرتقبة تقدر تأثر على ما تبقى من تماسك الحزب وتجعل كاع المقاليد فشخص واحد في حالة موافقة حمدي ولد الرشيد الي فالاول والأخير هو الي غادي ايقرر بحكم انو منسق الجهات الجنوبية الثلاث لحزب الميزان
