السمارة اليومية:السمارة
خلال الزيارة التي قام بها عامل السمارة لمنطقة لعطيف بجماعة حوزة ثارت بعد التساؤلات حول المغزى من الاهتمام بالقطاع الفلاحي بالاقليم واش كاينة شي استراتيجية ولا غير زيارة تفقدية عادية
عامل السمارة فهاد الزيارة لمنطقة لعطيف ولي بعيدة على السمارة بحوالي 120 كيلومتر ماكانش الهدف منها السياحة ولتقاط الصور اوهاني جيت اوسمعت لكسابة السمارة اوصافي حسب مصادر ديالنا بل الهدف منها هو اخذ فكرة حقيقية عن المنطقة الي تعتبر فلاحية وتصلح للزراعة
وتضيف المصادر انه غادي يكون مخطط مدروس باش تنهض السمارة فلاحيا بشكل حقيقي ويتم القطع مع الممارسات الي بسببها ماكاين حتى مشاريع فلاحية ناجحة ومستدامة
هادشي الي خلا عامل الإقليم تضيف ذات المصادر يوقف بشكل جدي على ملف النهوض بقطاع الفلاحة بالسمارة بتعاون مع الجهات المعنية حيت كاين واحد المشروع واعد بمنطقة عين النخلة بجماعة سيدي احمد لعروسي يقدر ايحسن من مردوية العلف بالاقليم وينعاكس ايجابيا على الرعي ومربي الماشية خاصة أن هاد المشروع كيتم التداول فيه وتقدر تكون واحد الزيارة لوزير الفلاحة الشهر المقبل للسمارة
هادشي كامل عندو واحد الرسالة بان السلطات طارحة خارطة طريق للنهوض بالاقليم تقدر ماتلقاش التجاوب ولا الفهم مع بزاف والفو الدنيا هانية هادي غير السمارة
وحسب بعض المتابعين للشأن المحلي فان هاد التحركات الي كتشهدها السمارة مع تعيين عامل جديد للاقليم كيشوفو بأنها مؤشرات على مرحلة جديدة تتبلور بالصحرا لم تكشف عن الخبايا ديالها كاملة على ضوء عدد من التطورات الاقليمية والدولية التي تخص ملف الوحدة الترابية
الدولة قادرة انها تنقذ الاقليم من الحالة الي كيعيشها فشتى المجالات شريطة وجود الارادة الحقيقية من كافة الاطراف من منتخبين واعيان ومثقفين ورجال الأعمال وسلطات ماشي شعارات فارغة لم تعد تغني ولا تسمن من جوع
